Մոսկվա-Թբիլիսի չվերթի մասին լուրն իրականությանը չի համապատասխանում

Մոսկվայի օդանավակայաններից մեկի՝ «Վնուկովոյի» կայքում ապրիլի 18-ից Մոսկվա-Թբիլիսի ուղիղ չվերթների մասին հրապարակված տեղեկությունն օդանավակայանը պարզաբանել է որպես տեխնիկական անսարքություն։ Գրում է aliq.ge -ն․

«Օդանավակայանի չվացուցակում փոփոխություններ չկան: Տեխնիկական անսարքության խնդիրն այս պահին լուծված է»,- հայտնել են օդանավակայանից, որի կայքում հրապարակվել էր թռիչքների վերսկսման մասին տեղեկատվությունը:

Նշենք, որ «Վնուկովո» օդանավակայանի կայքում հայտնվել էր տեղեկություն, ըստ որի վրացական ազգային փոխադրող Georgian Airways ավիաընկերությունը ապրիլի 18-ից հոկտեմբերի 29-ը կիրականացնի Թբիլիսի-Մոսկվա-Թբիլիսի չվերթն ամեն օր:

ՌԴ-ի և Վրաստանի միջև ուղիղ չվերթների վերսկսման մասին տեղեկատվությունը հերքել է Վրաստանի քաղաքացիական ավիացիայի գործակալությունը և Georgian Airways-ը։

Վրաստանի քաղաքացիական ավիացիայի գործակալությունը հայտարարություն տարածեց․

«Հայտարարում ենք, որ Վրաստանի և Ռուսաստանի միջև ուղիղ կանոնավոր օդային հաղորդակցություն չկա։ Ըստ այդմ, տարբեր աղբյուրներում տարածված տեղեկատվությունը վրացական ավիաընկերության կողմից Մոսկվայի ուղղությամբ ուղիղ չվերթներ իրականացնելու մասին չի համապատասխանում իրականությանը»,- ասված է քաղաքացիական ավիացիայի գործակալության հայտարարության մեջ։

Georgian Airways ընկերությունը ևս հանդես գալով հայտարարությամբ՝ նշել է.

«Նմանատիպ կեղծ, չհաստատված տեղեկատվություն նախկինում բազմիցս է տարածվել։ Իրականությանը չի համապատասպանում նաև այն, թե ավիաընկերությունը հայտ է ներկայացրել դեպի ՌԴ չվերթներ իրականացնելու վերաբերյալ»։

---

---