Վրաստանում ամեն 6 -րդ քաղաքացին մտածում է արտագաղթի մասին
«Ազգային ժողովրդավարական ինստիտուտի» (NDI) և «Հետազոտական ռեսուրսների կովկասյան կենտրոնի» (CRRC) հրապարակած հարցման համաձայն, Վրաստանի գրեթե յուրաքանչյուր վեցերորդ քաղաքացին արտերկրում ունի ընտանիքի անդամ, որն իրեն պարբերաբար ֆինանսական աջակցություն է ցուցաբերում:
Հարցին, թե արդյոք նրանք ունեն ընտանիքի անդամ, որ ներկայումս աշխատում է արտերկրում և պարբերաբար գումար է ուղարկում, 2023 թվականի մարտին հարցվածների 16 տոկոսը պատասխանել է՝ այո: Մինչդեռ 2019 թվականի հուլիսին կատարված հետազոտության համաձայն՝ այս տվյալները կազմել են 12 տոկոս։
Հետազոտության համաձայն, Վրաստանի բնակչության 15 տոկոսը նշել է, որ առաջիկա 12 ամիսների ընթացքում ակնկալում է արտագնա աշխատանքի մեկնել։ Հետազոտության հեղինակները նշել են, որ Վրաստանը լքելու ցանկությունը համեմատաբար մեծ է տարեց քաղաքացիների և տղամարդկանց շրջանում։
Ըստ հարցման արդյունքների՝ գնաճը, աշխատատեղերն ու աղքատությունը շարունակում են մնալ Վրաստանում ամենամեծ մարտահրավերները։ Յուրաքանչյուր երկրորդ քաղաքացին վատ է գնահատել Վրաստանի տնտեսական վիճակը:
Հարցին, թե՝ ինչպե՞ս են գնահատում Վրաստանի տնտեսության ներկա վիճակը, հարցվածների 48 տոկոսը պատասխանել է, որ այն վատ է, իսկ 42 տոկոսը՝ միջին։ Վրաստանի տնտեսության ներկա վիճակը լավ է գնահատել հարցվածների միայն 9 տոկոսը։
Հետազոտության հեղինակները նշել են, որ քաղաքացիների կեսը կասկածում է, որ կառավարությունը կկարողանա լուծել տնտեսական խնդիրները։ 2023 թվականի մարտին հարցվածների 50 տոկոսն ասել է, որ վստահ չէ, որ Վրաստանի կառավարությունը ի վիճակի է հաղթահարել տնտեսական խնդիրները:
Հետազոտությունն իրականացվել է NDI-ի և CRRC-Վրաստանի կողմից՝ Մեծ Բրիտանիայի և Հյուսիսային Իռլանդիայի Միացյալ Թագավորության Կառավարության արտաքին, համագործակցության և զարգացման գրասենյակի «Լավ կառավարման հիմնադրամի» ֆինանսական աջակցությամբ:
Հարցման արդյունքները հիմնված են 2023 թվականի մարտի հեռախոսային հարցման վրա: Հետազոտությունն իրականացվել է 2023 թվականի մարտի 17-23-ն ընկած ժամանակահատվածում և ներառել է 1 032 հարցազրույց: Հարցման միջին սխալի սահմանը +/- 2% է: Հարցվողներն ընտրվել են պարզ պատահականորեն՝ զանգահարելով պատահական համարով: aliq.ge
Opinion, pooling and voting
