Հատուկ գործողության արդյունքում ՊԱԾ-ը ձերբակալել է «Իսլամական պետության» վեց կողմնակիցների
Պետական անվտանգության ծառայության հակաահաբեկչական կենտրոնը լայնածավալ հատուկ գործողության արդյունքում դատարանի որոշման հիման վրա ձերբակալել է «Իսլամական պետություն» ահաբեկչական կազմակերպության կողմնակիցներին։
ՊԱԾ-ի տեղեկություններով՝ հակաահաբեկչական գործողությունն անցկացվել է միաժամանակ չորս վայրում, ձերբակալվել է Վրաստանի վեց քաղաքացի։«Հակաահաբեկչական կենտրոնի, Վրաստանի գլխավոր դատախազության և ներքին գործերի նախարարության համատեղ միջոցառումների արդյունքում ձեռք բերված ապացույցների համաձայն՝ պարզվել է, որ նշված անձինք կապեր են ունեցել «Իսլամական պետություն» ահաբեկչական կազմակերպության առաջնորդների հետ և նրա հրամանատարության տակ գտնվող մի շարք երկրներում ծրագրել են տարբեր տեսակի ահաբեկչական գործողություններ։
Քննչական գործողությունների արդյունքում հանվել են ահաբեկչական կազմակերպության խորհրդանիշները, էլեկտրոնային տեղեկատվություն կրող սարքեր, զինամթերք, պայթուցիկ նյութեր և հետաքննության համար կարևոր տարբեր ապացույցներ։
Գործը հետաքննվում է Վրաստանի Քրեական օրենսգրքի 328-րդ և 236-րդ հոդվածներով, որոնք վերաբերում են օտարերկրյա ահաբեկչական կազմակերպությանն անդամակցելուն, ահաբեկչական գործողություններին աջակցելուն, հրազենի, ռազմամթերքի և պայթուցիկ նյութերի ապօրինի ձեռքբերմանը և պահպանմանը։
Հետաքննությունը վարում է Պետական անվտանգության ծառայության հակաահաբեկչական կենտրոնը։ 1tv.ge
