«Անհնարին ոչինչ չկա». 18-ամյա Սուսաննայի հաջողության պատմությունը
Վրաց լեզվի ոչ բավարար իմացության պատճառով առաջացած խնդիրները, ինչպես բոլոր էթնիկ փոքրամասնությունների, իմ կողքով ևս անտարբեր չանցան. բոլոր խոչընդոտները, սակայն, հաղթահարելի են, եթե կա հստակ նպատակ, «Ալիք մեդիա»-ի հետ զրույցում կիսվելով իր հաջողության պատմությամբ, ասում է Վրաստանի Սամցխե-Ջավախեթիի մարզի Ախալցիխե քաղաքից Սուսաննա Համբարձումյանը:
Սուսաննան այժմ սովորում է Սամցխե-Ջավախեթիի պետական համալսարանում՝ «Պետական կառավարում» մասնագիտությամբ: Հիշում է՝ սկզբնական փուլում մասնագիտության ընտրության հարցում երկմտում էր, ի վերջո ընտրեց հենց այս ֆակուլտետը: Վստահեցնում է՝ ծնողների աջակցությունը մասնագիտության ընտրության հարցում ամենակարևորն էր:
«Ի սկզբանե այլ նպատակներ չունեի, քանի որ պետական լեզուն գիտեի, վստահ էի, որ կարող եմ գլուխ հանել, համալսարան ընդունվել»,- նշում է Սուսաննան:
Սուսաննան համալսարանն ավարտելուց հետո իր ապագան տեսնում է Վրաստանում՝ իր մասնագիտությամբ աշխատելիս: Անկեղծանում է՝ ցանկանում է աշխատել հարկային մարմնում. «Իմ մասնագիտությունն ինձ կտա իմ երազանքների աշխատանքը»:
Խոսելով համալսարանական կյանքում հանդիպած դժվարությունների մասին՝ 18-ամյա աղջնակն ասում է.
«Ես սովոր չէի հրապարակային խոսելուն, բայց հաղթահարեցի այս վախը: Սկզբում մտածում էի, որ ելույթումս թույլ տված սխալների համար ինձ վրա կծիծաղեն, բայց, բարեբախտաբար, այդպես չէր»:
Սուսաննայի խոսքով, տարբեր միջոցառումներին և զանազան վերապատրաստման ծրագրերին մասնակցելը սկսվել է ընդունվելուց հետո: Վերապատրաստման, ոչ ֆորմալ կրթությամբ զբաղվելու և աշխատասիրության արդյունքում Սուսաննան այսօր համալսարանի ինքնակառավարման անդամ է դարձել:
Նախքան համալսարան ընդունվելը նա զբաղվել է աթլետիկայով: 2017 թվականին աթլետիկայի թիմային հաղթանակից հետո Սուսաննայի կյանքում նոր փուլ է սկսվում: Թիմային հաղթանակից հետո նկատելով աղջնակի ներուժը, առաջարկում են զբաղվել սպորտով, առաջարկն անպատասխան չի մնում. «Քանի որ մարզաձևն իմ սրտով էր, չմերժեցի»:
Արդեն 2019 թվականին Սուսաննան աթլետիկայի ոլորտում հաջողություններ է գրանցում, ինչը, ըստ նրա՝ խթան էր՝ ոլորտում առաջ գնալու համար:
«2019 թվականին իմ հասակակիցների շրջանում զբաղեցրել եմ երկրորդ տեղը ողջ Վրաստանում»,- նշում է Սուսաննան և հավելում՝ երեք տարուց ավելի սպորտով զբաղվելուց հետո՝ 2020 թվականի համավարակի կարանտինային ժամանակահատվածում դադարեցրել է կյանքի այդ դրվագը:
Սուսաննայի կյանքի կարգախոսն է՝ «Անհնարին ոչինչ չկա», ինչն էլ ուժ է տալիս նոր հաջողությունների հասնելու համար: Ազատ ժամանակը Սուսաննան տրամադրում է գրքեր կարդալուն և երաժշտություն լսելուն: Նա տարբեր երիտասարդական ծրագրերի է մասնակցում. այս պահին մասնակցում է «Երիտասարդությունը հանուն քաղաքացիական ինտեգրման» ծրագրին:
Opinion, pooling and voting
