Երեք առեղծված, որոնք հնարավոր է կապված լինեն երկրաշարժի էպիկենտրոնի հետ. ՏԵՍԱՆՅՈւԹ

Նինոծմինդայի շրջանի Սամեբա գյուղում (նախկին անվանումները Կալինինո, Տրոից) հաճախակի են դարձել երկրաշարժերը։ Մասնագետները նշում են, որ ապրելով սեյսմավտանգ գոտում պարբերաբար տեղի են ունենում երկրաշարժեր և ամենաակտիվ գոտիներից մեկը հենց Ջավախքի խզվածքային գոտին է՝ Հայաստան-Վրաստան սահմանային գոտին, որտեղ տեղի են ունենում համեմատաբար շատ երկրաշարժեր, տեղի է ունենում խզվածքային գոտու լիցքաթափում։ Ուրիշ որևէ արտառոց կամ նոր բան չկա, ասում են մասնագետները։ Արտառոց բաներ թերևս կան, առհասարակ երկրաշարժի գոտում և մոտակայքում կան առեղծվածային երևույթներ որոնց մասին շատ քչերը գիտեն։ Թե ինչ կապ ունեն դրանք երկրաշարժերի հետ ոչ ոք չգիտի։ Ամեն դեպքում Ձեզ ենք ներկայացնում երեք առեղծվածային փաստեր.

• 1. Քչերը գիտեն, որ հենց երկրաշարժի էպիկենտրոնում գոյություն ունի մի վայր, որտեղ սարերի մեջ, թեքության վրա մեքենան մարած վիճակում հետընթաց բարձրանում է դեպի վերև, ջուրը նույնպես այստեղ հոսում է դեպի վերև այլ ոչ թե ներքև։ NOR- ի լրագրողը անձամբ է եղել այստեղ և կատարել փորձարկումներ։ Թե սա ինչ կապ ունի երկրաշարժերի հետ գիտական ոչ մի ուսումնասիրություն չի կատարվել։ Հարկ է նշել, որ այսպիսի մի վայր գոյություն ունի նաև Հայաստանի Հանրապետությունում։

• 2. Երկրորդ առեղծվածային փաստը ամպերն են։ Մադաթափա լճի, Ժդանովականի և Սամեբայի երկնքում շատ հաճախ հանդիպում են եզակի դասավորվածությամբ ամպեր, որոնք շատ հաճախ հիշեցնում են ալիքների։ Տեղացիները ասում են, որ սա ուղիղ կապ ունի երկրաշարժի հետ և տեկտոնիկ շարժումների հետևանք է։ Այսպիսի ամպերի դասավորվածությունը հայտնվում է երկրաշարժից դեռևս ժամեր առաջ և սրան հետևել է նաև NOR-ի լրագրողը և 80 տոկոսի դեպքում համընկնում է։ Այս երևույթի մասին գիտական ոչ մի ուսումնասիրություն և փաստ ևս չկա։ Ալիքավոր ամպերի մասին միայն հայտնի է, որ դրանց առաջացմանը նպաստում է նաև ցամաքի մակերևույթը։ Իրար հաջորդող լեռների և հովիտների վրայով անցնող օդային հոսանքներն առաջացնում են ալիքային շարժումներ և մթնոլորտի բավարար խոնավության պայմաններում ալիքավոր ամպերի առաջացման պատճառ են դառնում։

• 3. Երրորդ առեղծվածը դա Մադաթափա լիճն է, որը իր ափերի մոտ ունի մի քանի փոսեր, որտեղ ամեն մի փոսը մեկ ժամվա ընթացքում կլանում է տասնյակ տոննաներով ջուր։ Թե որտեղ է անհետանում ջուրը և որտեղից է այն դուրս գալիս այստեղ նույնպես ոչ մի գիտական բացատրություն և ուսումնասիրություն չկա։ Եթե ջուրը անհետանում է ինչ որ խորության մեջ այդ դեպքում ինչպես են ձկները մուտք գործում ջուրը կլանող փոսերի մեջ և դուրս գալիս, առեղծվածներ, որոնք բացահայտված չեն։ Միակ փաստը այն է, որ այստեղ ինչ որ բան այն չէ։

Ինչ վերաբերում է հաճախակի տեղի ունեցող երկրաշարժերին՝ մասնագետները ասում են, որ այստեղ սեյսմիկ ակտիվ գոտի է և ցնցումները կշարունակվեն, իսկ պատճառները հայտնի չեն թե ինչի հետևանքով են տեղի ունենում երկրաշարժերը, իսկ դա ուսումնասիրելու համար և ցանկացած կանխատեսում անելու համար հարկավոր է կատարել բարդ ու թանկարժեք հետազոտություններ: Բնակիչները վախենում են, իսկ մասնագետները ասում, որ խուճապի մատնվել պետք չէ, բայց պետք է շատ զգոն լինել, որովհետև ոչ ոք երբեք չգիտի թե երբ տեղի կունենան ցնցումները և ինչ ուժգնությամբ։

---

---