Ջավախքի կյանքն ու կոլորիտը՝ հայ եւ վրացի լուսանկարիչների օբյեկտիվում

Հայ եւ վրացի 20 լուսանկարիչներ երեք օր շարունակ շրջել են Ջավախքի տարբեր շրջաններում, գյուղերում եւ քաղաքներում, ծանոթացել դրանց կյանքին ու բարքերին՝ լուսանկարելով այն ամենը, ինչն իրենց զարմացրել, հիացրել ու տպավորել է: Աշխատանքները ներկայացվեցին այսօր՝ ՀԲԸՄ դահլիճում, «Բացահայտենք Ջավախքը» խորագրով լուսանկարչական ցուցահանդեսում: Մոտ 4 հազար լուսանկարներից ցուցահանդեսի համար ընտրվել է 100 աշխատանք՝ 15 լուսանկարիչների գործեր, որոնց օբյեկտիվներում Ջավախքն է՝ իր բնապատկերներով ու կոլորիտով: Նախաձեռնությունն իրականացել է «Ջավախքին աջակցություն» հիմնադրամի, ՀՀ ԿԳՄՍ նախարարության, Հայ լուսանկարիչների ազգային ասոցիացիայի եւ Հայկական բարեգործական ընդհանուր միության համագործակցությամբ:

ՋԱՀ-ի հոգաբարձուների խորհրդի նախագահ Սոս Սահակյանը լրագրողների հետ զրույցում ասաց, որ հիմնադրամն ունի ծրագրերի մեծ փաթեթ․ ֆոտոցուցահանդեսը հերթական միջոցառումն է: Նա կարեւորեց միջոցառումը՝ Ջավախքի կյանքն ու գույները ներկայացնելու իմաստով: «Մենք, մինչ այս, Ջավախքում ունեցել ենք գեղանկարչության եւ մշակութային այլ ցուցահանդես: Համավարակի պայմաններում անգամ ՋԱՀ-ի նախագահությունն ու տնօրինությունը շատ մեծ աշխատանք կատարեցին: Դեռ շատ անելիքներ ունենք: Հիմնադրամն իր տեսակի մեջ միակն է, որը, բարձր նշաձող վերցրած, առաջ է գնում՝ շատ ավելի լուրջ խնդիրներ լուծելու: Բոլորովին վերջերս Տերյանի տուն-թանգարանի թանգարանային մասի բացումն արեցինք, այսօր արդեն տուն-թանգարանի գործերով ենք զբաղված։ Զուգահեռաբար գնում են նաեւ «Արմաթ» լաբորատորիաների բացման աշխատանքները: Փորձում ենք Ջավախքն ընդգրկել Հայաստան-Վրաստան տուրիստական երթուղիների մեջ»,- տեղեկացրեց Սահակյանը:

Հայաստանի լուսանկարիչների միության նախագահ Սերգեյ Հակոբյանն էլ շեշտեց՝ Ջավախքն իր կոլորիտով շատ հետաքրքիր վայր է: «Բազմիցս եղել եմ, բայց ամեն լինելուց նոր բացահայտումներ եմ անում: Շատ կարճ էր ժամանակահատվածը՝ երեք օրում անփորձ լուսանկարիչների հետ անցկացվեցին կարճ դասընթացներ, բացատրվեց խնդիրը: Կոնկրետ գնահատական չեմ կարող տալ լուսանկարներին, մեր նպատակը բարձրակարգ լուսանկարչական ցուցահանդես ունենալը չէր: Մեր խնդիրն էր Ջավախքի հայ բնակիչների ու հայաստանաբնակ հայ լուսանկարիչների հետ, մեր վարպետների հսկողության տակ, անցկացնել այս նախագիծը»,- ասաց նա՝ հույս հայտնելով, որ առաջիկայում դա շարունակական կլինի:

ՋԱՀ-ի գործադիր տնօրեն Սամվել Մկոյանը Yerkir.am-ի հետ զրույցում ընդգծեց՝ Ջավախքի մասին Հայաստանում այնքան էլ տեղեկացված չեն, ցուցահանդեսը կազմակերպվեց նաեւ հենց այդ նպատակով: «Քանի որ նկարների բազան շատ է, ցուցադրվող աշխատանքները կփոփոխվեն: Այսօրվա այցելուները, կարծում եմ, ցուցահանդեսով իրապես կբացահայտեն Ջավախքը՝ նրա բնապատկերներով, գեղատեսիլ վայրերով ու կոլորիտով: Գրեթե բոլոր ցուցադրված աշխատանքները հավանում եմ»,- ասաց նա: yerkir.am ՋԱՀ

Մանրամասները՝ տեսանյութում.