Անհայտ անձինք ահռելի քանակությամբ աղբ են թափել Նինոծմինդա քաղաքի Նորաշեն թաղամասում

Նինոծմինդա քաղաքում՝ Նորաշենի հատվածում, անհայտ անձինք հսկայական քանակությամբ աղբ են նետել։

Փչացած կարտոֆիլ, կոտրված թիթեղ, պոլիէթիլենային տոպրակներ, կենցաղային աղբ,այս ամենը կարելի է տեսնել այս հատվածով անցնելիս:

Ինչպես նշում է քաղաքի բնակիչ Սոցկար Փութուլյանը, այս վայրը վերածվել է աղբանոցի. Թե կոնկրետ ով է դուրս նետել հսկայական քանակությամբ կենցաղային աղբը, հայտնի չէ։ Սակայն դա վնասում է Կլոր լճի ողջ տարածքը և հարակից տները։ Քամին փչում և ցելոֆանները ցրում է ամբողջ տարածքում։

Քաղաքապետարանում ասում են, որ չգիտեն, թե կոնկրետ ով է աղբը դուրս նետել։ Այնուամենայնիվ, նրանք աշխատում են այս ուղղությամբ՝ պարզելու, թե ով է նետել աղբը և շտկել խնդիրը:

Հիշեցնենք, որ ուժի մեջ է մտել տուգանքների մասին օրենքը, որտեղ մինչև 2 կիլոգրամ աղբը փողոց նետելու համար խախտողը կտուգանվի 80 լարիով (մոտ 33,2 դոլար), իսկ շենքի պատուհանից՝ 100 լարիով (մոտ 41,5 դոլար)։ 2 կիլոգրամից ավելի աղբը փողոց նետելը պատժվում է 150 լարի տուգանքով(մոտ 62,3 դոլար), իսկ պատուհանից՝ 500 լարիով (մոտ 208 դոլար)։ Հինգ և ավելի անվադող դեն նետողները ստիպված կլինեն 500 լարի տուգանք վճարել։ Վտանգավոր թափոններով շրջակա միջավայրի աղտոտման դեպքում ֆիզիկական անձանց տուգանքը կազմում է 400 լարի (մոտ 166 դոլար), իսկ իրավաբանական անձանց համար՝ հազար լարի (մոտ 415 դոլար)։