Պարենային ապրանքների բարձր գները կշարունակվեն մինչև 2024 թվականի վերջ. Համաշխարհային բանկ

Պարենային ապրանքների բարձր գները կշարունակվեն մինչև 2024 թվականի վերջ. Համաշխարհային բանկ

Համաշխարհային բանկի հրապարակած թարմացված զեկույցի համաձայն՝ ապրանքների պատմականորեն բարձր գները կշարունակվեն մինչև 2024 թվականի վերջ՝ պայմանավորված ռուս-ուկրաինական պատերազմի հետևանքով առաջացած տնտեսական շոկով, մատակարարման շղթայի հետաձգմամբ, արտադրական գործընթացների ժամանակավոր դադարեցմամբ և համաշխարհային գնաճով:

Վերլուծաբանների գնահատմամբ, միջազգային շուկայում էներգակիրների գների աճի միտումը ամենասուրն է 1973 թվականի ճգնաժամից ի վեր։ Սննդամթերքի և պարենային ապրանքների գները նույնպես զգալիորեն աճում են՝ պայմանավորված այն հանգամանքով, որ Ռուսաստանն ու Ուկրաինան պարենամթերքի խոշորագույն մատակարարներն են, իսկ բնական գազի գների աճը հանգեցնում է պարարտանյութերի գների բարձրացմանը, որն իր հերթին արտացոլվում է գյուղատնտեսական արտադրանքի վրա։

«Ընթացիկ իրադարձությունները մեծացնում են ստագֆլյացիայի ռիսկերը (գնաճի բարձր ցուցանիշ, որն ուղեկցվում է արտադրության լճացումով և բարձր գործազրկությամբ)։ «Քաղաքական գործիչներն ու օրենսդիրները պետք է ամեն ինչ անեն՝ խթանելու տեղական տնտեսությունը և խուսափեն գործողություններից, որոնք կարող են վնասել համաշխարհային տնտեսությանը», – ասել է Համաշխարհային բանկի տնտեսական աճի, ֆինանսների և ինստիտուտների փոխնախագահ Ինդերմիտ Գիլը:

Համաշխարհային բանկի գնահատմամբ՝ մինչև 2022 թվականի վերջը էներգիայի գները կբարձրանան 50%-ով, թեև ակնկալվում է, որ աճը կդանդաղի 2023 թվականից:

2022 թվականին սպասվում է գյուղատնտեսական ապրանքների արժեքի 20 տոկոս, ցորենի գնի 40 տոկոս աճ, որի դեպքում առաջիկա տարիներին ակնկալվում է աճի տեմպերի դանդաղում։

Չնայած համեմատաբար դրական երկարաժամկետ ակնկալիքներին, Համաշխարհային բանկի վերլուծաբանները գնահատում են, որ գները մոտակա տարիներին 5 տարվա միջինից բարձր կլինեն՝ Ռուսաստան-Ուկրաինա պատերազմի շարունակման և մատակարարման շղթայի հավելյալ սահմանափակումների հետ ավելի մեծացնելով ապրանքների և էներգիայի գնաճի ռիսկերը: