Քանի՞ մարդ է Նինոծմինդայում տուժել կենդանիների կծելուց

2023 թվականին Նինոծմինդայի մունիցիպալիտետում կենդանիների կծելուց տուժել է 77 մարդ։ Այս մասին հայտնում են Նինոծմինդայի հանրային առողջապահության կենտրոնից։

Բայց դա չի նշանակում, որ խնդիրն աննշան է։ Հարձակումների թիվը կարող է շատ ավելի մեծ լինել, քանի որ շատ բնակիչներ չեն հայտնում միջադեպերի մասին:

«2023 թվականին տարբեր կենդանիների կծելու 77 դեպք ենք արձանագրել։ Եվ բոլորն էլ բարի ավարտ ունեցան, մոնիտորինգ ենք արել՝ կատաղության ոչ մի դեպք չի եղել»,- ասաց Նինոծմինդայի հանրային առողջության կենտրոնի տնօրեն Տիգրան Եղոյանը։

Նինոծմինդայի մունիցիպալիտետում գրանցված 77 դեպքերից 68-ը եղել է շների կծած, վեցը կատվի, 2-ը փորսուղի, մեկ դեպքը` խոզի կծելուց: Հիվանդանոց եկած բոլոր հիվանդները ստացել են հակակատաղության դեմ բուժում։ Կատաղության դեմ պատվաստանյութը տրամադրվում է անվճար։

Ինչպես հավելեց Տիգրան Եղոյանը, շների կծելու 68 դեպքի մասով 20-ը եղել է թափառող շներից, 48-ը՝ ընտանի շներից։ Նաև կծելու 77 դեպքից 20-ը գրանցվել է մինչև 15 տարեկան երեխաների մոտ։

Ժամանակին պատվաստումը վարակված կենդանու կծելուց հետո կանխարգելման միակ միջոցն է։

Ամեն տարի Նինոծմինդայի հանրային առողջության կենտրոնը կազմում է ժամանակացույց, ըստ որի ամեն ամիս ստանում է կատաղության դեմ պատվաստանյութի որոշակի չափաբաժին։ Առողջապահության կենտրոնը կատաղության դեմ պատվաստանյութ և կատաղության դեմ միջոց է ստանում Հիվանդությունների վերահսկման ազգային կենտրոնից։ Ստացված պատվաստանյութը պահվում է հատուկ սառնարաններում, որտեղ պահպանվում է ջերմաստիճանի ռեժիմը, որը պահպանվում է տեղափոխման ժամանակ։

Հավելենք, որ Վրաստանի օրենսդրությունն արգելում է դաժան վերաբերմունքը կենդանիների նկատմամբ, ինչը նշանակում է, որ շներին սպանելը խնդրի ընդունելի լուծում չէ։ Սակայն տեղական իշխանությունները ուղիներ են փնտրում այս խնդրի լուծման համար, թեև այս պահին դրա համար հատկացված գումար և ծրագրեր չկան։