Վրաստանում կրկին ցանկանում են ընդունել օտարերկրյա գործակալների մասին օրենքը
Վրաստանի խորհրդարանը պատրաստվում է կրկին նախաձեռնել օտարերկրյա գործակալների մասին օրինագիծ։ Այս մասին ճեպազրույցում հայտարարել է «Վրացական երազանքի» գործադիր քարտուղար Մամուկա Մդինարաձեն։
Անցած մարտին այս օրինագիծը հազարավոր բողոքի տեղիք տվեց, և արդյունքում իշխող կուսակցությունը ստիպված եղավ հրաժարվել այդ գաղափարից, որը խիստ կապված է ռուսական փորձի հետ։
«Խորհրդարանական մեծամասնությունը կուսակցության քաղաքական խորհրդի հետ խորհրդակցելուց հետո որոշել է արտաքին ազդեցության թափանցիկության մասին օրինագիծը կրկին ներկայացնել խորհրդարան»,- ասել է Մդինարաձեն։
Նրա խոսքով, ոչ պետական հատվածի ֆինանսավորման 90 տոկոսը թափանցիկ չէ. Իշխող կուսակցությունը նախկինում բազմիցս ասել է, որ դժգոհ են արեւմտյան դրամաշնորհներով գործող կազմակերպությունների աշխատանքից։
Օտարերկրյա ազդեցության թափանցիկության մասին օրինագիծը փոքր փոփոխություններով կրկին կներկայացվի Վրաստանի խորհրդարան, նշել է Մդինարաձեն։
Նրա խոսքով, «օտարերկրյա ազդեցության գործակալ» սահմանման փոխարեն կլինի «օտար տերության շահերը հետապնդող կազմակերպություն»։
«Հիշեցնեմ, որ օրինագիծը նախատեսում է միակ պահանջը՝ օտարերկրյա ֆինանսավորում ստացող կազմակերպությունների կողմից տարեկան ֆինանսական հաշվետվության հրապարակում, խախտման համար նախատեսված են միայն ֆինանսական պատժամիջոցներ։ Սա հանրային հաշվետվողականության և թափանցիկության նվազագույն չափանիշն է, որին պետք է համապատասխանի ցանկացած կազմակերպություն, նույնիսկ այն կազմակերպությունը, որը պնդում է, որ ազնիվ է: Այսպիսով, օրինագծի բովանդակությունը քննադատության նույնիսկ նվազագույն հիմքեր չի տալիս։ Ընթացիկ նստաշրջանի ավարտին օրենքը կընդունվի բոլոր երեք ընթերցումներով»,- ասել է Մդինարաձեն։
Opinion, pooling and voting
