![](https://nor.ge/am/wp-content/uploads/xsliva.jpg.pagespeed.ic.-3yuv-T-CM.jpg)
Ամերիկացի ուռուցքաբան Նիկոլ Էնդրյուսի խոսքով՝ վերամշակված մսի և ալկոհոլի գործածությունը կարող է բարձրացնել քաղցկեղի զարգացման հավանականությունը։
Ինչպես պարզաբանել է բժիշկը, ալկոհոլի բոլոր տեսակները պարունակում են էթանոլ, որը լուրջ մուտագեն գործոն է և վնասում է բջջային ԴՆԹ-ն։ Էնդրյուսի խոսքով՝ մարդու մարմնի բջիջներն ամեն օր վնասվում են, քանի որ սա բնական ծերացման գործընթացի մասն է, սակայն, այնուամենայնիվ, ալկոհոլի օգտագործման հետևանքով նման վնասների կուտակումը բարձրացնում է լյարդի, կրծքագեղձի, հաստ աղիքի, ստամոքսի, կերակրափողի, բերանի խոռոչի և կոկորդի քաղցկեղի զարգացման վտանգը:
Ինչ վերաբերում է վերամշակում անցած մսին, ապա այն բարձրացնում է կոլոռեկտալ քաղցկեղի (հաստ աղիքի քաղցկեղ) զարգացման հավանականությունը։ Վերամշակված միս է համարվում՝ կենդանական ծագման այն մթերքը, որը ստացվում է աղով մշակման, պահածոյացման, ծխեցման կամ պահպանման ժամկետի ավելացմանն ու համի բարելավմանն ուղղված այլ գործընթացների արդյունքում: Բանն այն է, որ երշիկի, նրբերշիկի կամ խոզապուխտի պատրաստումը ենթադրում է բարձր ջերմաստիճանի տևական ազդեցություն և պահածոյացնող նյութերի գործածություն, իսկ դրանք քաղցկեղածին գործոններ են։
Բացի այդ ուռուցքաբանը հավելել է, որ վտանգավոր կարող է համարվել նաև կարմիր միսը (խոզի միս, տավարի միս և գառան միս)։ Բանն այն է, որ կարմիր միսը պարունակում է հեմային երկաթ, որը ևս քաղցկեղածին ազդեցությամբ օժտված տարր է։