Իրենց ունեցածից գոհ մարդիկ ավելի քիչ են հակված սրտի կամ ուղեղի կաթվածի

Նոր հետազոտությունը ցույց է տվել, որ իրենց ունեցածից գոհ մարդիկ ավելի քիչ են հակված սրտի կաթված կամ ուղեղի կաթված ստանալու: Հետազոտության արդյունքները հրապարակվել են Journal of the American Heart Association-ում:

«Մեր բացահայտումները հաստատում են առողջապահական խնամքի ամբողջական մոտեցումը, որտեղ մարդու մտավոր և հուզական բարեկեցության բարելավումը սրտի հիվանդությունների և ուղեղի կաթվածի կանխարգելման անբաժանելի մասն է համարվում»,- պատմում է Չինաստանում Հեֆեյի գիտության և տեխնոլոգիաների համալսարանին առընթեր Կաթվածի դեմ պայքարի կենտրոնի փոխտնօրեն, հետազոտության ավագ հեղինակ Վեն Սունգը:

Հետազոտությունն իրականացնելու համար գիտնականները վերլուծել են Մեծ Բրիտանիայում բժշկական խոշորամասշտաբ տվյալների բազայի՝ Բիոբանկի ավելի քան 120 հազար մասնակիցներից ստացված տվյալները:

Մասնակիցները լրացրել են հարցաթերթիկներ, որոնցում գնահատել են իրենց բարեկեցությունը ընտանիքի, ընկերական հարաբերությունների, առողջության, ֆինանսների և ընդհանուր երջանկության նկատմամբ բավարարվածության տեսանկյունից:

Գիտնականները մարդկանց բարեկեցությունը համեմատել են չորս հիմնական սրտանոթային հիվանդությունների զարգացման վտանգի հետ: Արդյունքները վկայում են, որ բարեկեցության ամենաբարձր միավորներ ունեցող մարդանց՝

Սրտանոթների կարծրացման (աթերոսկլերոզի) վտանգը ցածր է 44%-ով,

Ուղեղի կաթվածի վտանգը ցածր է 45%-ով,

Սրտի անբավարարության վտանգը ցածր է 51%-ով,

Սրտի նոպայի վտանգը ցածր է 56%-ով։