Վրաստանը սկսում է կորցնել անկախությունը. Առնոլդ Ստեփանյան
«Բազմազգ Վրաստան» ՀԿ-ի հիմնադիր Առնոլդ Ստեփանյանը «Ալիք Մեդիա Վրաստան»-ի հետ զրույցում ասաց` Վրաստանը սկսում է կորցնել անկախությունը:
«Այն ամենը, ինչ կատարվում է վերջին մեկ տարում, հատկապես վերջին վեց ամիսներին՝ պայքար է քաղաքացիական սեկտորի դեմ, նաև սպառնալիք է քաղաքական կուսակցությունների համար։ Այս քայլերը կարող են հանգեցնել մեկուսացման. բացի մեկուսացումից, դա կբերի ավելի սերտ հարաբերությունների ավտորիտար պետությունների հետ, իսկ հաջորդ քայլերն արդեն կախված կլինեն Ռուսաստանից»,-ասաց Ստեփանյանը:
Նրա խոսքով` հնարավոր են անկանխատեսելի զարգացումներ, որոնք կարող են աղետալի հետևանքներ ունենալ երկրի համար:
«Ըստ իս, կա երկու ելք. կամ` ընդհանրապես չխաղալ իրենց կանոններով, դրա հետ մեկտեղ երկրի ներսում մոբիլիզացնել լուրջ ռեսուրս, երկրորդ՝ գնալ դեպի նպատակաուղղված ընտրություններ և հաղթել, որպեսզի նրանք, ովքեր ցանկանում են փոխել Եվրոպայի ուղին,այդ թվում` Ռուսաստանը, հարմարավետ չզգան իրենց և առաջին քայլերը չձեռնարկեն սահմանադրական դաշտում»,- ընդգծեց հասարակական կազմակերպության հիմնադիրը:
Հիշեցնենք. այսօր Վրաստանի կառավարությունը հայտարարել է, որ չի ցանկանում Եվրամիության հետ բանակցություններ սկսել մինչև 2028 թվականի ավարտը։ Այս հայտարարությունն իշխող «Վրացական երազանք» կուսակցության գրասենյակում արել է Վրաստանի վարչապետ Իրակլի Կոբախիձեն։
Հայտարարությունից հետո Թբիլիսիում և մի շարք քաղաքներում քաղաքացիները բողոքի ցույց են սկսել «Վրացական երազանք»-ի որոշման դեմ:
Նախագահ Սալոմե Զուրաբիշվիլիի խոսքով՝ այսօր ոչ լեգիտիմ իշխանությունը պատերազմ է հայտարարել սեփական ժողովրդին։ aliq.ge
Opinion, pooling and voting
