Ո՞վ կկարողանա աշխատել դպրոցում

Ախալքալաքի շրջանի դպրոցներում ներկայումս բավականին շատ քննարկվում է այն թեման, որ, եթե ուսուցիչը, կամ ուսուցիչ դառնալ ցանկացողը, չունի մանկավարժի համապատասխան կրթություն, չի կարողանա աշխատել որպես մանկավարժ, եթե անգամ հաղթահարել է առարկայական քննությունները։

Jnews-ը փորձեց ճշտել և պարզաբանել, թե ովքե՞ր կարող են աշխատել որպես մանկավարժ։ Այս հարցով մենք դիմեցինք «Ուսուցչի տուն», որտեղից պատասխանեցին, որ՝ որպես մանկավարժ կարող են աշխատել այն անձիք, ովքեր ունեն մանկավարժի համապատասխան կրթություն և հաղթահարել են առարկայական քննության անցողիկ շեմը։

Իսկ այն անձինք, ովքեր ցանկանում են աշխատել  հանրակրթական դպրոցներում որպես մանկավարժ, բայց մասնագիտությամբ մանակավարժ չեն, պարտադիր պետք է անցնեն ուսուցչի վերապատրաստման 60 կրեդիտանոց ծրագիրը, և հանձնեն առարկայական քննությունը։

Ինչպես մեզ հայտնեցին Ախալքալաքի կրթական ռեսուրս կենտրոնից, այն ուսուցիչները, ովքեր չունեն ավագ ուսուցչի կոչում և համարվում են պրակտիկոս ուսուցիչ, կկարողանան աշխատել դպրոցում մինչև 2026 թվականը։

Հիշեցնենք, որ ուսուցիչների և ուսուցիչ դառնալ ցանկացողների գրանցումը հնարավոր էր մարտի 11-ից ապրիլի 2-ը։ Գրանցվածները մինչև ապրիլի 10-ը իրավունք ունեն փոխել առարկան, քննության լեզուն և քննական քաղաքը։

---

---