Արտակարգ դրություն Նոր Զելանդիայում

Նոր Զելանդիայի մայրաքաղաք Ուելինգթոնը ենթարկվել է վերջին տասնամյակի ամենաուժեղ քամիներին, ինչի հետևանքով դպրոցները փակվել են, իսկ թռիչքները՝ չեղարկվել։ Միաժամանակ երկրի հարավային հատվածում, ներառյալ Քրայսթչըրչ քաղաքը, հայտարարվել է արտակարգ դրություն՝ 24 ժամ տևած ուժգին անձրևներից հետո։

Ուելինգթոնում քամու միջին արագությունը հասել է մինչև 87 կմ/ժ (54 մղոն/ժ), ինչը ամենաբարձրն է 2013 թվականից ի վեր։ Մայրաքաղաքից հարավ գտնվող ծովափնյա Բերինգ Հեդում քամու պոռթկումները հասել են մինչև 160 կմ/ժ, հայտնում է երկրի եղանակաբանական ծառայությունը։

Քաղաքում հայտարարվել է ամենաբարձր մակարդակի կարմիր նախազգուշացում: Մի քանի ճանապարհներ փակվել են, իսկ ծովափնյա հատվածներում ալիքները դուրս են եկել ափ և աղբ են նետել ճանապարհների վրա։

Տեղական իշխանությունները քաղաքացիներին հորդորել են մնալ փակ տարածքներում։ Ծովափնյա մի թաղամասի բնակիչներին խորհուրդ է տրվել գիշերել այլ վայրում՝ հնարավոր ջրհեղեղի վտանգի պատճառով։ Ուելինգթոնի միջազգային օդանավակայանում արդեն կեսօրից հետո մի շարք թռիչքներ չեղարկվել են, իսկ Հյուսիսային և Հարավային կղզիների միջև գործող լաստանավային երթևեկությունը ժամանակավորապես դադարեցվել է։ Մի քանի դպրոցներ և Վիկտորիայի համալսարանը նույնպես փակվել են։

Քրայսթչըրչում ուժգին անձրևների պատճառով առաջացած ջրհեղեղները, հողի սահքերը և ծառերի անկումները լուրջ խնդիրներ են առաջացրել քաղաքում։

---

---