Ռուսթավիի ավտոշուկան տուգանվել է 848 հազար 276 լարիով

Վրաստանի մրցակցության և սպառողների պաշտպանության գործակալությունը (GCCA) ավարտել է ավտոմեքենա ներմուծողների համատեղ բողոքի հիման վրա հարուցված գործի քննությունը և հաստատել «Ռուսթավի ավտոշուկա» ՍՊԸ-ի և «Միկադո Ջորջիա» ՍՊԸ-ի կողմից գերիշխող դիրքի չարաշահման փաստը։ Այս տեղեկությունը տարածել է գործակալությունը։

«Հարցի ուսումնասիրության շրջանակներում GCCA-ն պարզել է, որ 2023 թվականին Ռուսթավիի ավտոտոնավաճառի տարածքում կայանատեղիների օգտագործման պատասխանատու տնտեսվարողները գործել են անարդարացիորեն բարձր գներով։ Գնի բարձրացումը կատարվել է երկու և ավելի անգամ, ինչը զգալիորեն մեծացրել է մեկ կայանատեղիի օրական վճարի և «արժեք գումարած շահույթ» հարաբերակցության տարբերությունը։ Վերջնական արդյունքում գործակալությունն այս գործողությունը գնահատել է որպես գերիշխող դիրքի չարաշահում, որը դրսևորվել է անարդարացիորեն բարձր գնի սահմանմամբ», — ասված է գործակալության հայտարարության մեջ։

Գործակալության որոշմամբ, դեպքի առթիվ որպես պատժամիջոց կիրառվել է 848 հազար 276 լարիի չափով տուգանք։ Դրանից բացի, հետաքննության շրջանակներում երկու պատասխանող ընկերություններն էլ տուգանվել են 3 անգամ՝ ընդհանուր առմամբ 26 հազար լարի՝ գործակալությանը թերի տեղեկատվություն տրամադրելու համար. տեղեկությունները տրվել են դատարանի միջնորդությամբ։

Ընկերությունները որոշումը կարող են բողոքարկել մեկամսյա ժամկետում Թբիլիսիի քաղաքային դատարանում։ aliq.ge

---

---