Սև ծովում թունավոր ձկներ են տարածվում. Բնապահպանները զգուշացնում են
Մի քանի աղբյուրներ, ներառյալ իխթիոլոգները, Ուկրաինայի պետական էկոլոգիական ծառայությունները և Աբխազիայի հանրապետությունը, հաստատել են Սև ծովում ներմուծված արծաթափայլ տետրադոնի (Lagocephalus sceleratus)՝ հայտնի նաև որպես ֆուգու ձուկ կամ փքվող ձուկ, ի հայտ գալը, որը մահացու վտանգ է ներկայացնում մարդու համար սննդի մեջ օգտագործելու դեպքում։
Այս արևադարձային գիշատիչը, որն ի սկզբանե բնակվում էր Հնդկա-Խաղաղօվկիանոսյան տարածաշրջանում, Միջերկրական ծով է հասել Սուեզի ջրանցքով և 2014 թվականից սկսած սկսել է տարածվել Սև ծովում։ Ձուկը պարունակում է ամենաուժեղ նեյրոտոքսինը՝ տետրոդոտոքսինը, որը վնասում է մարդու նյարդային համակարգը և կարող է մահացու թունավորում առաջացնել նույնիսկ նվազագույն քանակությամբ օգտագործելու դեպքում։
Իխթիոլոգ Արչիլ Գուչմանիձեն տեղեկացրել է, որ Վրաստանի ափերի մոտ՝ Չակվիսծղալիի գետաբերանի շրջանում, բռնել է արծաթափայլ տետրադոն և հրապարակել է լուսանկար, որը հաստատում է այս հայտնագործությունը։ Միևնույն ժամանակ, Վրաստանի շրջակա միջավայրի ազգային գործակալությունը հայտարարում է, որ այս վտանգավոր ձկան առկայության վերաբերյալ պաշտոնական տվյալներ այս պահին չունեն։
Նույն ժամանակում Աբխազիայի Հանրապետության Գիտությունների ակադեմիայի Էկոլոգիայի ինստիտուտի տնօրեն Ռոման Դբարը նշել է, որ ձուկը արդեն հայտնաբերվում է Սև ծովի հյուսիս-արևմտյան հատվածում՝ Ուկրաինայի ափերին մոտ և կարող է տարածվել ավելի հեռու։
«Ձկնատեսակի չափսերն ու փշոտ մակերեսը հաշվի առնելով՝ այն որևէ խոհարարական հետաքրքրություն չի ներկայացնում։ Բայց անկախ այդ ամենից, մարդիկ պետք է տեղյակ լինեն, որ այն չի կարելի օգտագործել սննդի մեջ։ Աբխազիայի ափերին այս ձուկը դեռևս չի գրանցվել, այստեղ այն ոչ ոք չի նկատել։ Հիմնական փաստերը վերաբերում են Սև ծովի հյուսիս-արևմտյան հատվածին՝ Ուկրաինայի ափերին մոտ։ Հենց այդտեղից ֆուգու ձուկը կարող է հայտնվել նաև մեր ջրերում», – ասել է էկոլոգը։
Ուկրաինայի պետական էկոլոգիական տեսչությունը 2025 թվականի հունիսին պաշտոնապես հաստատել է արծաթափայլ տետրադոնի հայտնվելը Օդեսայի մարզի ափերին և զգուշացրել է էկոհամակարգին, ձկնորսությանը և բնակչության առողջությանը սպառնացող լուրջ ռիսկերի մասին։ Տեսչությունը կոչ է անում ձկանը հայտնաբերելու դեպքում այն լուսանկարել՝ որևէ մասշտաբային առարկայի հետ, նշել կոորդինատները և տեղեկացնել իրենց։
Էկոլոգները նշում են, որ ջրի ջերմաստիճանի բարձրացման և գլոբալ տաքացման պայմաններում արծաթափայլ տետրադոնը ունի Սև ծովում ավելի լայն տարածման ներուժ, ինչը կարող է լուրջ վնաս հասցնել տեղական բուսաշխարհին, կենդանական աշխարհին և ձկնորսությանը։
Opinion, pooling and voting
