Ինչպես է սնունդը ազդում 50-ից բարձր տարիքի մարդկանց երջանկության զգացողության վրա

Մեծ Բրիտանիայում անցկացված նոր խոշոր ուսումնասիրությունը ցույց է տվել, որ սննդանյութերով հարուստ դիետան կարող է բարձրացնել երջանկության և կյանքի իմաստի զգացումը տարեց հասակում, սակայն դրա ազդեցությունը սերտորեն կապված է տրամադրության, առողջական վիճակի և եկամտի մակարդակի հետ։

Հետազոտության արդյունքները հրապարակվել են «British Journal of Health Psychology» ամսագրում։

Գիտնականները վերլուծել են, թե արդյոք 50 տարեկանից բարձր մարդիկ ավելի շատ ձուկ, բանջարեղեն, մրգեր և առողջարար ճարպեր են օգտագործում և պարզել են, որ այսպես սնվողները, միջին հաշվով, ավելի երջանիկ են և կյանքից ավելի գոհ։ Այնուամենայնիվ, ապացույցները դեռևս համոզիչ չեն և անհրաժեշտ են ավելի մանրակրկիտ երկայնական ուսումնասիրություններ։

Օգտագործվել են Անգլիայի ծերացման լոնգիտուդինալ հետազոտության (ELSA) տվյալները, որն ընդգրկել է 50-ից բարձր տարիքի մարդկանց։ Դիետան գնահատվել է 24-ժամյա հարցման հիման վրա՝ երկու պատահական օր։ Հոգեբանական բարեկեցությունը չափվել է երեք պարամետրերով՝ անձնական իմաստի և աճի զգացողություն, տվյալ պահին երջանկություն և կյանքից բավարարվածություն։ Վերլուծության ժամանակ հաշվի են առնվել տարիքը, սեռը, էթնիկ պատկանելությունը, առողջական վիճակը, եկամուտները, կրթությունը, միայնությունը, քրոնիկ հիվանդությունները և դեպրեսիվ ախտանիշները։

Նմուշի միջին տարիքը կազմել է մոտավորապես 69 տարեկան և մասնակիցների կեսից մի փոքր ավելին կանայք են եղել: Մեծ մասը օրական կերել է մոտավորապես երկու բաժին միրգ և բանջարեղեն, ինչը զգալիորեն ցածր է խորհուրդ տրվող հինգ բաժնից: Բազմաչհագեցած ճարպերը ապահովել են օրական էներգիայի մոտավորապես 2.5%-ը՝ նույնպես զգալիորեն ցածր խորհուրդ տրվող մակարդակից: Մասնակիցների կեսից ավելին հարցման օրերին ձուկ չէր ուտում:

Հետազոտության արդյունքները ցույց են տվել, որ մրգերի և բանջարեղենի օգտագործումը կայուն կապ ունի կյանքի իմաստի և անձնային աճի զգացողության հետ՝ նույնիսկ դեպրեսիան հաշվի առնելուց հետո։ Սակայն երջանկության և կյանքից ընդհանուր բավարարվածության զգացումների հետ կապն ավելի թույլ էր, եթե հաշվի էին առնվում դեպրեսիվ ախտանիշները և քրոնիկ հիվանդությունները։ Ձուկը միակ մթերքն էր, որի օգտագործումը բոլոր ճշգրտումներից հետո մշտապես կապված էր երջանկության զգացողության հետ։

Հեղինակներն ընդգծում են, որ դիետան փոփոխվող գործոն է և մրգերի, բանջարեղենի և ձկան օգտագործման ավելացումը կարող է պարզ և մատչելի ռազմավարություն լինել տարեց մարդկանց մոտ հոգեբանական բարեկեցությունը բարելավելու համար։ Այնուամենայնիվ, հետազոտության բնույթի (միայն մեկ պահի ուսումնասիրություն, ոչ թե երկարատև դիտարկում), ինչպես նաև ինքնահաշվետվության մեթոդների և հիշողության հնարավոր սխալի պատճառով, հնարավոր չէ վստահորեն ասել, որ հենց սնունդն է բարեկեցության բարելավման պատճառ։

---

---