Գիտնականներն ահազանգում են ամբողջ աշխարհում երեխաներին ախտահարող հիվանդության մասին

Աշխարհում ավելանում է մանկական հիպերտոնիայի դեպքերի թիվը․ այս մասին ասվում է Lancet պորտալում հրապարակված հետազոտության մեջ։

«Մանկական հիպերտոնիան ախտահարում է աշխարհի երեխաների զգալի և աճող հատվածին»,- գրում է պարբերականը։

Գիտնականները միտումը կապում են կենսակերպի վատթարացման և ճարպակալման դեպքերի աճի հետ։ Վերլուծելով հոդվածների տվյալները, որոնք ընդգրկել են ընդհանուր առմամբ 443 914 երեխայի, հեղինակները պարզել են, որ 2000-2020 թվականներին մանկական հիպերտոնիայի տարածվածությունը գրեթե կրկնապատկվել է՝ տղաների շրջանում 3,4%-ից հասնելով 6,53%-ի, իսկ աղջիկների շրջանում՝ 3,02%-ից 5,82%-ի։

Մեկնաբանելով հետազոտության արդյունքները՝ Իսպանիայի սրտաբանական ընկերության նախագահ Իգնասիո Ֆերնանդես Լոսանոն հայտարարել է, որ դրանք միայն հաստատում են այն, ինչ մասնագետները վաղուց նկատում են իրենց պրակտիկայում, տեղեկացնում է РИА Новости-ն։

«Սա անհանգստություն է առաջացնում, քանի որ տեսնում ենք, որ երեխաների և դեռահասների սիրտ-անոթային համակարգի վիճակը անընդհատ վատթարանում է։ Հիպերտոնիան մեծահասակների հիվանդություն է, և դրա ի հայտ գալը նման վաղ տարիքում տագնապալի է»,- զգուշացրել է նա։

Զարկերակային հիպերտենզիան սիստոլիկ զարկերակային ճնշման (ՍԶՃ)՝ 140 մմ սնդ. սյուն և ավելի բարձրացման համախտանիշն է, որը կարող է ուղեկցվել կամ առանձին դրսևորվել դիաստոլիկ ԶՃ (ԴԶՃ) ≥ 90 մմ սնդ. սյուն ցուցանիշով։ Ըստ ԱՀԿ-ի տվյալների, 2020 թվականի վերջին աշխարհում հիպերտոնիա ունի 1,13 միլիարդ մարդ, ընդ որում՝ նրանց մոտ 40%-ը չգիտի իր հիվանդության մասին, և միայն տասը տոկոսն է բուժում ստանում։

---

---