Ծխախոտից մասնակի հրաժարումը գրեթե չի նվազեցնում սրտի հիվանդությունների ռիսկը․ PLOS

Ջոնս Հոփքինսի բժշկական կենտրոնի գիտնականները պարզել են, որ ծխախոտի օգտագործումը կրճատելը գրեթե չի նվազեցնում սրտանոթային հիվանդությունների ռիսկը. միայն ծխելը լիովին թողնելն է զգալի օգուտներ բերում: Ուսումնասիրության արդյունքները հրապարակվել են PLOS Medicine ամսագրում:

Աշխատանքը միավորել է 22 երկարաժամկետ կոհորտային հետազոտությունների տվյալներ, որոնց մասնակցել է 323 826 չափահաս և որոնց դիտարկումներն իրականացվել են գրեթե 20 տարի։ Այդ ընթացքում գրանցվել է ավելի քան 125 հազար մահ և 54 հազար սիրտ-անոթային հիվանդությունների դեպք։ Հետազոտողները վերլուծել են կամավորների ծխելու փորձը, ծխախոտների օրական քանակը և ծխելը թողնելուց հետո անցած ժամանակը՝ օգտագործելով Քոքսի համամասնական ռիսկերի մոդելները։

Մասնակիցների միջին տարիքը մոտավորապես 60 տարեկան է եղել, իսկ մեծամասնությունը՝ կանայք: Ուսումնասիրությանը մասնակցելու պահին 14%-ը ծխողներ են եղել, 49%-ը թողել է ծխելը, իսկ 36%-ը երբեք ծխախոտային արտադրանք չի օգտագործել:

Հետազոտության մեջ ներառվել է ժողովրդագրական փոփոխականները, մարմնի զանգվածի ինդեքսը, շաքարախտը, սրտի իշեմիկ հիվանդությունը և ալկոհոլի օգտագործումը։

Արդյունքները ցույց են տվել, որ նույնիսկ օրական մի քանի ծխախոտ ծխելը կապված է եղել սրտանոթային հիվանդությունների ռիսկի զգալի աճի հետ։

«Ներկայիս և նախկին ծխողների համար վտանգի աստիճանը որոշվում է երեք գործոնով՝ ծխելու տևողությամբ, ծխախոտների օրական քանակով և ծխախոտից հրաժարվելուց հետո անցած ժամանակով։ Սակայն միայն ծխախոտից ամբողջական հրաժարվելն է էապես նվազեցնում սրտի և անոթների հիվանդությունների զարգացման հավանականությունը», – ասել է բժշկական գիտությունների դոկտոր, Չիքքարոնեի անվան սրտանոթային հիվանդությունների կանխարգելման կենտրոնի կլինիկական հետազոտությունների տնօրեն և հետազոտության առաջատար հեղինակ Մայքլ Բլահան։

---

---