Մառնեուլիում գնացքը բախվել է ոչխարների հոտին

Երեքշաբթի՝ 2026 թվականի ապրիլի 14-ին, Մառնեուլիի մունիցիպալիտետում գնացքի բախման հետևանքով երկաթգծի վրա հայտնված մի քանի տասնյակ ոչխար է անկել։ Տեղեկությունն առաջինը տարածել է տեղական «TV24» (24news.ge) հեռուստաընկերությունը։

Դեպքի վայրում մոբիլիզացվել էր ոստիկանությունը։

Ըստ «TV24»-ի՝ հովիվը կորցրել է մոտ 40 գլուխ ոչխար։ Տարածված կադրերում երևում է, որ երկաթգծի վրա՝ Մառնեուլիի Ծերեթելի գյուղի հարակից տարածքում, ընկած են տասնյակ կենդանիներ, որոնց մարդիկ հեռացնում են գծերից։

Տեղի բնակիչներից մեկի խոսքով՝ գնացքը գալիս էր Շուլավերի գյուղի կողմից։ Վարորդը փորձել է դանդաղեցնել ընթացքը, սակայն չի հասցրել և բախվել է երկաթգծի վրա գտնվող հոտին։

Ներքին գործերի նախարարության մամուլի կենտրոնից «Ազատություն» ռադիոկայանին հայտնել են, որ տեղի ունեցածի առնչությամբ հովիվը տուգանվել է վարչական կարգով։

Նա տուգանվել է Վարչական իրավախախտումների վերաբերյալ օրենսգրքի 127-րդ հոդվածով, որը, ի թիվս այլ հանգամանքների, ենթադրում է ճանապարհի երկայնքով անասունների արածեցման կանոնների խախտում։

• Հոդվածը վերաբերում է «միջազգային կամ ներպետական նշանակության ճանապարհներին խոշոր կամ մանր եղջերավոր անասունների տեղաշարժի կանոնների խախտմանը»։

• Կանոնների խախտումը առաջացնում է 10 լարի տուգանք՝ պատասխանատու անձի (հովվի, իսկ նրա բացակայության դեպքում՝ տիրոջ) նկատմամբ։

• Այն դեպքում, երբ իրավախախտմանը հետևել է տրանսպորտային միջոցի, բեռի, ճանապարհի կամ այլ գույքի թեթև վնասում, տուգանքի չափը կազմում է 100 լարի։