Սեպտեմբերի 1-ից Վրաստանում կխստացվի ջրօգտագործման վերահսկողությունը
Վրաստանի կառավարությունը հաստատել է կանոններ, որոնց համաձայն՝ 2026 թվականի սեպտեմբերի 1-ից Վրաստանում կսկսվի ջրօգտագործման պետական հաշվառում։
Հաշվառման ենթակա կլինի ձեռնարկատերերի և ֆիզիկական անձանց կողմից ստորերկրյա և մակերևութային ջրերի օգտագործումը, այդ թվում՝ ջրամբարներում ջրի հավաքումը, եթե ջրառը գերազանցում է մեկ խորանարդ մետրը, ինչպես նաև թափոնների արտահոսքը։
Հաշվառման ներդրման նպատակն է ջրային ռեսուրսների օգտագործման վերաբերյալ տեղեկատվության հավաքագրումը, ջրային օբյեկտների վրա ազդեցության գնահատումը և Վրաստանի ջրային ռեսուրսների պաշտպանությունը։
Ջրօգտագործման հաշվառմամբ կզբաղվի Շրջակա միջավայրի ազգային գործակալությունը, իսկ կանոնների պահպանման վերահսկողությունն ու խախտումների համար տուգանքների կիրառումը կիրականացնի Շրջակա միջավայրի վերահսկողության գործակալությունը։
«Ջրային ռեսուրսների կառավարման մասին» օրենքով Վրաստանի ջրային ռեսուրսները ճանաչվել են պետական սեփականություն, իսկ մասնավոր ընկերությունները արտադրական նպատակներով ջուր օգտագործելու համար պետք է համապատասխան թույլտվություն ստանան։
Opinion, pooling and voting
