Վրաստանի յուրաքանչյուր 5 -րդ քաղաքացի մտածում է արտագաղթի մասին. NDI
«Ազգային ժողովրդավարական ինստիտուտի» (NDI) և «Հետազոտական ռեսուրսների կովկասյան կենտրոնի» (CRRC) հրապարակած հարցման համաձայն՝ Վրաստանի յուրաքանչյուր հինգերորդ քաղաքացի մտածում է արտագաղթի մասին։
Հարցին, թե առաջիկա 12 ամիսներին որքան է արտագնա աշխատանքի մեկնելու հավանականությունը, հարցվածների 20 տոկոսն ասել է, որ հնարավոր է: Հեռանալ ցանկացողների թիվը հատկապես մեծ է մինչև 50 տարեկան տարիքային խմբում։ Ըստ հետազոտության հեղինակների՝ նրանցից գրեթե յուրաքանչյուր երրորդը մտածում է արտագաղթի մասին։
NDI-ի հարցման համաձայն, հնարավոր արտագաղթի մասին մտածում են 18-34 տարիքային խմբի հարցվածների 29 տոկոսը, 35-54 տարիքային խմբում՝ 26 տոկոսը:
Նույն հարցման համաձայն, Վրաստանի յուրաքանչյուր հինգերորդ քաղաքացի գործազուրկ է։ Գործազուրկների մեծ մասն ասել է, որ կա՛մ ընդհանրապես աշխատանք չի գտնում, կա՛մ համապատասխան աշխատավարձով աշխատանք չի գտնում։
Ըստ NDI-ի հարցման՝ յուրաքանչյուր երկրորդ հարցվողն ասել է, որ վերջին 6 ամիսներին պատահել է, երբ գումար չի ունեցել կոմունալ վարձերը վճարելու համար, իսկ յուրաքանչյուր հինգերորդն ասել է, որ իրենց ընտանիքը նույնիսկ սննդի համար գումար չունի։ Հարցվածների մեծ մասն ասել է, որ այժմ ունի նույն չափի կամ ավելի քիչ ֆինանսական հնարավորություններ, քան հինգ տարի առաջ։
Ի դեպ, նշված հարցումը հիմնված է Վրաստանի չափահաս բնակչության դեմ առ դեմ հարցման արդյունքների վրա, որն անցկացվել է Վրաստանի ողջ տարածքում՝ (բացառությամբ օկուպացված տարածքների) դեկտեմբերի 3-ից դեկտեմբերի 20-ը:
Հարցումն ընդհանուր առմամբ ներառում է 2 519 հարցազրույց։ Հարցման մեջ սխալի միջին սահմանը +/- 1,6 տոկոս է։ NDI-ի հետազոտությունն իրականացվում է Միացյալ Թագավորության կառավարության աջակցությամբ: aliq.ge
Opinion, pooling and voting
