Ջիգրաշենում և Մամզարայում անցկացվեց հարիսայի փառատոն

Առաջին անգամ Ջիգրաշեն և Մամզարա գյուղերում անցկացվեց հարիսայի փառատոն, որը նախորդում է Բուն Բարեկենդանի տոնին:

Մեծ Պահքին նախորդող տոնին Ջիգրաշենի և Մամզարայի եկեղեցիներում Նինոծմինդայի մունիցիպալիտետի հոգևոր հովիվ Տեր Արմաշ Պողոսյանը օրհնեց հարիսայով լի կաթսան և տերունական աղոթքից հետո այն բաժանվեց հավաքված մարդկանց:

Հարիսան ձավարից, հավի արգանակից և մսից պատրաստված շիլա է: Արգանակի մեջ լցված ձավարը եփվում է մսի հետ միասին երեք ժամ շարունակ և համարվում է պատրաստ, երբ այն եփվելով դառնում է միասեռ: Այնուհետև ավելացնում են աղ, պղպեղ, յուղ, և հարիսան կարելի է արդեն ճաշակել:

Տոնը իրենց գեղեցիկ պարային համարներով գեղեցկացրին Ջիգրաշեն գյուղի “Նաիրի” համույթը` պարուսույց Լուսինե Մզիկյանի ղեկավարությամբ:

Քահանա Տեր Արմաշ Պողոսյանը շնորհակալություն հայտնեց կնքահայրեր Գարեգին Մանուկյանին և Մնացական Կարապետյանին գյուղերում տոնի կազմակերպմանն աջակցելու համար: Քահանան պատմեց նաև տոնի խորհրդի մասին` բնակիչներին կոչ անելով տոնի ավանդույթները փոխանցել սերնդե սերունդ:

Նշենք, որ փետրվարի 11-ին` Բուն Բերեկենդանի տոնին, հարիսայի փառատոն կանցկացվի նաև Նինոծմինդա քաղաքում:

Նյութը պատրաստեց Բորիս Ղարսլյանը

---

---