Զանգվածային ժամանց անցկացնելու պատճառով օբյեկտը տուգանել ու փակել են
Դեկտեմբերի 3-4-ը Աշխատանքի տեսչությունն իր հսկողության ընթացքում բացահայտել է «Կամուրջ» ակումբում արգելված ժամանցի փաստը, ինչի պատճառով ակումբը փակվել է և վարչական իրավախախտումների վերաբերյալ օրենսգրքով սահմանված կարգով տուգանվել։ Այս մասին տեղեկությունը տարածում է Աշխատանքի տեսչական ծառայությունը։
Գերատեսչության տվյալներով՝ Աշխատանքի տեսչությունը բազմիցս զգուշացրել է զանգվածային ժամանցի արգելքի մասին, քանի որ զանգվածային զվարճանքները կամ սոցիալական միջոցառումները շարունակում են արգելված մնալ՝ չնայած դեկտեմբերի 1-ից կատարված փոփոխություններին՝ համաձայն Վրաստանի կառավարության մեկուսացման և կարանտինի N322 որոշման։
«Այնուամենայնիվ, ակումբի ղեկավարությունը հաշվի չի առել այս հանգամանքը և, չնայած երկրում տիրող համաճարակային իրավիճակին, զանգվածային ժամանցային միջոցառում է կազմակերպել։
Հաշվի առնելով նշված հանգամանքները՝ Աշխատանքի տեսչությունը որոշում է կայացրել օբյեկտը փակել և տուգանել 10 000 լարիով»,- ասված է հաղորդագրությունում։
Աշխատանքի տեսչական ծառայությունը նաև նշում է, որ տեսչությունը սերտորեն համագործակցում է քաղաքապետարանի և էկոնոմիկայի նախարարության համապատասխան ստորաբաժանումների հետ՝ «կանաչ գոտիների» հայեցակարգի մշակման անվտանգ արձանագրություն սահմանելու ուղղությամբ, որը կթարմացնի ոլորտի գործունեությունը։
«Աշխատանքի տեսչությունը շարունակում է ուշադրությամբ վերահսկել ողջ երկրում՝ ինչպես «կանաչ գոտիների» անվտանգ հայեցակարգի մոնիտորինգի, այնպես էլ արգելված սոցիալական միջոցառումների հայտնաբերման ուղղությամբ»,– ասված է հաղորդագրությունում։tv9news.ge
Opinion, pooling and voting
