Ռուբլիի եւ լարիի փոխարժեքը Նինոծմինդայում. Որտեղ ինչ արժե

Ուկրաինա Ռուսաստան կոնֆլիկտի ֆոնին ռուբլին ինչպես դոլարի, անյպես էլ վրացական լարիի նկատմամբ արժեզրկվել է։ Ռուսական արժույթի նոր ռեկորդային ցածր մակարդակը նկատվել է նաեւ Նինոծմինդայի շրջանում:

NOR ռադիոկայանի լրագրողը այսօր՝ մարտի 2 -ին, այցելեց Նինոծմինդա քաղաքի բանկեր ճշտելու համար ռուբլիի փոխարժեքը:

Նինոծմինդայի «Credo» բանկի տվյալների համաձայն, այսօր 1000 ռուբլին արժե 14 լարի, իսկ 1000 ռուբլի գնելու դեպքում 37 լարի: «TBC» եւ «Liberty» բանկերում դադարեցված է ռուբլու առքը եւ վաճառքը: Նինոծմինդայի միկրոֆինանսական ընկերությունից(ლომბარდ) տեղեկացանք, որ այսօրվա դրությամբ 1000 ռուբլին արժե 30 լարի, իսկ 1000 ռուբլի ձեռք բերելու համար արժե 35 լարի: Նինոծմինդայի բիրժայի մասնավոր աշխատակիցների խոսքով՝ ռուբլու առքը այսօր 35 լարի է իսկ վաճառքը 30 լարի:

«Մի քանի ամիս առաջ 1000 ռուբլին փոխանակում էինք 40-45 լարիով, այժմ այն գրեթե գին չունի: Մեր Ջավախքի բնակչության մեծ մասը Ռուսաստան է գնում աշխատելու, եթե այդ փողը այսօրվա փոխարժեքով փոխեն ժողովրդի աշխատանքն ու քրտինքը հավասար կլինի զրոյի: Բայց հույս ունենք, որ պատերազմը շուտ կավարտվի եւ ամեն ինչ կվերադառնա իր բնականոն հունին»,- մեզ հետ զրույցում ասաց բնակիչներից մեկը:

Նշենք որ Վրաստանի Ազգային բանկի հրապարակած տվյալների համաձայն՝ մարտի 2 -ին, 100 ռուբլին արժե 3.1359 լարի է, ԱՄՆ մեկ դոլարն արժե 3.2244 լարի, եվրոն՝ 3,6039 լարի, բրիտանական ֆունտ ստերլինգը՝ 4,3188 լարի։

Մանրամասները՝ աուդիոձայնագրությունում.