Վրաստանը և Հարավային Կորեան ցանկանում են կանոնավոր չվերթներ սկսել
Վրաստանի ավիացիոն իշխանությունների ներկայացուցիչները քննարկել են Վրաստանի և Հարավային Կորեայի միջև կորեական առաջատար ավիափոխադրողների հետ կանոնավոր չվերթներ սկսելու հնարավորությունը, հաղորդում է Վրաստանի Միացյալ օդանավակայանների մամուլի ծառայությունը։
Քաղաքացիական ավիացիայի գործակալության փոխտնօրեն Ալեքսանդր Գաչեչիլաձեի և Վրաստանի Միացյալ օդանավակայանների գլխավոր տնօրեն Լևան Մոսեշվիլիի գլխավորած պատվիրակությունը հանդիպել է Կորեայի առաջատար ավիաընկերությունների՝ Korean Air-ի և T’way Air-ի ներկայացուցիչների հետ։
Նշվել է, որ Korean Air-ը արդեն դիմում է ներկայացրել Վրաստանի քաղաքացիական ավիացիայի գործակալություն՝ ամառային նավիգացիոն սեզոնի ընթացքում չարտերային չվերթներ իրականացնելու համար։
2019-2025 թվականներին ավիաընկերությունները Վրաստանի և Հարավային Կորեայի միջև իրականացրել են 11 չարտերային չվերթներ։
Հանդիպումների ժամանակ կողմերը քննարկել են նաև տեղական ավիացիոն շուկայի ներուժը և Կորեայի Հանրապետությունից զբոսաշրջության ծավալների ավելացման հնարավորությունները։
Վրաստանի և Հարավային Կորեայի միջև դիվանագիտական հարաբերությունները հաստատվել են 1992 թվականի դեկտեմբերին։ Երկրները համագործակցում են զբոսաշրջության, առևտրի, շրջակա միջավայրի պաշտպանության և այլ ոլորտներում։ 2020 թվականի նոյեմբերին նրանք հայտարարել են ազատ առևտրի համաձայնագրի շուրջ բանակցությունների մեկնարկի մասին։
