Թուրքմենստանի նախագահ Սերդար Բերդիմուհամեդովը ժամանել է Վրաստան

Թուրքմենստանի նախագահ Սերդար Բերդիմուհամեդովը պաշտոնական այցով ժամանել է Վրաստան: Թբիլիսիի միջազգային օդանավակայանում թուրքմեն առաջնորդին և նրա պատվիրակության անդամներին դիմավորել է փոխվարչապետ և Վրաստանի պաշտպանության նախարար Իրակլի Չիկովանին:

Պաշտոնական դիմավորման արարողությունը տեղի է ունեցել նախագահական պալատում, որտեղ Բերդիմուհամեդովին դիմավորել է Միխեիլ Կավելաշվիլին:

Նախագահական վարչակազմի տվյալներով՝ պալատում նախատեսված է Կավելաշվիլիի և Բերդիմուհամեդովի դեմ առ դեմ հանդիպում: Կողմերը կքննարկեն երկկողմ համագործակցության խորացման հեռանկարները, ինչպես նաև տարածաշրջանային հարցեր:

Ավելին, ըստ Վրաստանի պաշտպանության նախարարության, վաղը կկայանա Վրաստանի վարչապետ Իրակլի Կոբախիձեի և Թուրքմենստանի նախագահի անձնական հանդիպումը: Նախատեսված են նաև երկկողմ հանդիպումներ նախարարների հետ:

---

---