Գերմանիա աշխատանքի մեկնած Վրաստանի քաղաքացիները չեն կարող վերադառնալ հետ

Վրաստանի քաղաքացիների մի մասը, ովքեր օրինական զբաղվածության ծրագրի շրջանակներում մեկնել էին Գերմանիա, չեն կարող վերադառնալ Վրաստան: Նրանք պետք է հետ թռչեին Վրաստան, բայց ժամանակին չեն ստացել «ՊՇՌ թեստի» պատասխանները, այդ իսկ պատճառով նրանց թույլ չեն տվել թռչել: Ըստ Վրաստանի արտաքին գործերի նախարարության, դեսպանատունը փորձում է օգնել քաղաքացիներին:

«Զբաղվածության ծրագրի շրջանակներում Գերմանիայում գտնվող Վրաստանի 11 քաղաքացիներն ուշացել են Քյոլն-Ստամբուլ չվերթից, որով պետք է վերադառնային Վրաստան: Քաղաքացիներն անմիջապես կապվել են հյուպատոսական ծառայության հետ և տեղեկացրել խնդրի մասին:

Տեղեկատվություն ստանալուց հետո հյուպատոսական ծառայությունը սկսել է աշխատել քաղաքացիներին օգնելու և նրանց խնդիրները լուծելու ուղղությամբ:

Հյուպատոսությունը մշտական կապի մեջ է Վրաստանի քաղաքացիների հետ և ամեն կերպ փորձում է օգնել նրանց ժամանակին վերադառնալ հայրենիք», – ասել են Արտաքին գործերի նախարարությունից:

Գերմանիայի օդանավակայանում հայտնված Վրաստանի 11 քաղաքացին այն խմբի անդամներն են, որոնք հունիսի 10-ին սեզոնային աշխատանքի ծրագրով մեկնել էին Գերմանիա, բայց հայտնվել են բնակության ցածր և անմարդկային պայմաններում: Սրան գումարվեց նաև այն փաստը, որ գործատուն նրանց պայմանագրի պայմաններով չէր վճարում:

Այդ պատճառով, հունիսի 18-ին, նրանք Գերմանիայի աշխատանքի և սոցիալական հարցերի նախարարության համապատասխան գերատեսչության կողմից տեղափոխվեցին նոր գործատուի մոտ: Խմբի անդամների կարծիքով, մյուս գործատուի մոտ բնակության պայմանները բավարար էին, բայց վարձատրության հարցը շարունակում էր մնալ խնդիր: Մասնավորապես, նոր գործատուն Վրաստանի քաղաքացիներին վարձատրում էր քաղված ելակի քանակով, և ոչ թե մեկ ժամով, ինչպես նախատեսված է պայմանագրով: Արդյունքում, ըստ աշխատակիցների, իրենց վճարել են խոստացվածից 4 անգամ պակաս: Այդ պատճառով խմբի 11 անդամներ որոշել են ժամանակից շուտ վերադառնալ Վրաստան: Նրանք պետք է վերադառնային այսօր: 1tv.ge

Ընթերցեք նաև՝