Մոլերում կստեղծվի լրացուցիչ պատվաստման սենյակներ
Մենք աշխատում ենք առևտրի կենտրոնների հետ, որպեսզի հասարակական վայրերում լրացուցիչ փոքր պատվաստման սենյակներ բացվեն, – այս մասին հայտարարել է Առողջապահության փոխնախարար Թամար Գաբունիան:
Նրա խոսքով, զանգվածային պատվաստումների մեկնարկի պահին պատվաստումները կիրականացվեն շաբաթը յոթ օր, իսկ պատվաստանյութի սենյակները կաշխատեն առնվազն ութ ժամ:
«Այսօր պատվաստումների ծրագրում ներգրավված կլինիկաների հետ հանդիպումներ տեղի ունեցան, ինչպես Թբիլիսիում, այնպես էլ մարզերում` զանգվածային պատվաստումների մեր պատրաստակամությունը վերանայելու համար: Այսօր ծրագրում ընդգրկված է մինչև 290 բրիգադ, յուրաքանչյուր բրիգադ հնարավորություն ունի օրական 60 պատվաստում իրականացնել: Որոշ բրիգադների հաջողվում է օրվա ընթացքում պատվաստումների քանակը հասցնել 90-ի: Այսօր մենք պայմանավորվեցինք առավելագույն ռեժիմ սահմանելու մասին, ինչը նշանակում է, որ պատվաստումները կիրականացվեն շաբաթը յոթ օր, պատվաստումների սենյակները կաշխատեն առնվազն ութ ժամ: Որոշ կլինիկաներ արդեն անցել են երկու հերթափոխի, որոնք ապահովում են 12-ժամյա գրաֆիկ: Դա կդյուրացնի պատվաստումները ինչպես աշխատանքային, այնպես էլ հանգստյան օրերին:
Նախատեսվում է նաև կազմակերպել լրացուցիչ տարածքներ բժշկական հաստատություններից դուրս: Նման տարածքներից մեկն արդեն գործում է Հուալինգ համալիրում, և մենք այժմ աշխատում ենք առևտրի կենտրոնների հետ հասարակական վայրերում լրացուցիչ սենյակներ տեղադրելու համար, որտեղ քաղաքացիները կկարողանան պատվաստվել որակյալ բժշկական հսկողության ներքո: Կարծում ենք ՝ ակտիվությունը բարձր կլինի: Այս կլինիկաներից յուրաքանչյուրն ընդլայնվելու ներուժ ունի այնպես, որ մենք ամսական առնվազն կես միլիոն պատվաստում իրականացնենք», – հայտարարել է Թամար Գաբունիան:1tv.ge
Opinion, pooling and voting
