Սննդամթերքի համաշխարհային գներն աճում են ամենաարագ տեմպերով
Սննդամթերքի համաշխարհային գները վերջին տասնամյակի ամենաարագ տեմպերով են աճում՝ խորացնելով աշխարհի առավել խոցելի երկրների խնդիրները, որոնք բախվում են կորոնավիրուսային համավարակի հետեւանքների հետ, հայտնել է AFP-ն:
ՄԱԿ-ի Պարենի եւ գյուղատնտեսության կազմակերպությունը (ՊԳԿ) մտահոգված է, որ գնաճը կարող է սոցիալական հուզումներ առաջացնել այն երկրներում, որոնք արդեն գտնվում են քաղաքական ցնցումների մեջ:
ՊԳԿ-ի տվյալենորվ՝ սննդամթերքի գները մայիսին գրեթե 40 տոկոսով բարձր էին, քան մեկ տարի առաջ, ինչը ամենակտրուկ աճն էր 2011 թվականի սեպտեմբերից ի վեր: 12 ամսվա ընթացքում եգիպտացորենի գներն աճել են 88 տոկոսով, սոյայինը՝ 73 տոկոսով, հացահատիկինը եւ կաթնամթերքինը՝ 38 տոկոսով, շաքարավազինը՝ 34 տոկոսով, իսկ մսինը՝ 10 տոկոսով: «Սա շատ մտահոգիչ է», – ասել է Պարենի համաշխարհային ծրագրի գլխավոր տնտեսագետ Արիֆ Հուսեյնը:
2007-2008 թվականներին հիմնական սննդամթերքի կտրուկ գնաճը անկարգությունների հանգեցրեց աշխարհի մի շարք քաղաքներում: 2010-2011 թվականներին հասնելով գագաթնակետին՝ գնաճը հրահրեց «Արաբական գարնան» ընդվզումներ:
Համաշխարհային տնտեսությունը վերականգնվում է, սակայն գնաճը նույնպես աճում է, քանի որ կառավարությունները հսկայական գումարներ են ծախսել տնտեսությունների խթանման ծրագրերի վրա այն բանից հետո, երբ անցյալ տարի համավարակը կանգնեցրեց տնտեսական ակտիվությունը:
Գնաճը Չինաստանում , որը, ըստ Համաշխարհային բանկի կանխատեսումների, 2021 թվականին կաճի 8,5 տոկոսով, ընդգրկում է հիմնական սննդամթերքները, ինչպիսիք են հացահատիկային մշակաբույսերը, միսը եւ այլն: «Իրականում, Չինաստանն է, որ ներկայումս օժանդակում է սննդամթերքի գնաճին», – ասել է տնտեսագետ Ֆիլիպ Չալմինը:
Գների բարձրացման այլ շարժիչ ուժերից են երաշտը Բրազիլիայում (ինչի հետեւանքով բարձրանում է եգիպտացորենի գինը), նավթի գնի վերականգնումը եւ ծովային փոխադրումների արժեքի աճը: news.am
Opinion, pooling and voting
