Կամ թեստ, կամ պատվաստում, կամ էլ աշխատանքից ազատում. Նոր օրենք ՀՀ-ում

ՀՀ Առողջապահական եւ աշխատանքի տեսչական մարմինը հոկտեմբերի 1-ից շարունակելու է ստուգայցեր իրականացնել հայաստանյան տնտեսվարողների մոտ: Այս մասին լրագրողների հետ զրույցում ասել է ՀՀ առողջապահական եւ աշխատանքի տեսչական մարմնի Հիգիենիկ, սանիտարահիգիենիկ եւ հակահամաճարակային վերահսկողության վարչության պետ Աննա Հարությունյանը:

«Ստուգայցերը պատահական են, որեւէ մեկը տեղյակ չի, թե որ գործատուի մոտ պետք է լինի ստուգայցը: Բոլոր պահանջները ստուգվում են, որոնք ներառված են 17-Ն հրամանում, եւ որեւէ պահանջի խախտման դեպքում գործատուն ենթարկվում է տուգանքի», – ասաց Աննա Հարությունյանը:

Նրա խոսքով, ֆիզիկական անձանց դեպքում տուգանքը առաջին անգամ հայտնաբերման դեպքում 10-20 000 դրամ է, իրավաբանական անձանց դեպքում՝ 40-120 000 դրամ:

Հիշեցնենք, որ հոկտեմբերի 1-ից եթե մարդիկ պատվաստված չլինեն, պետք է 14 օրը մեկ թեստավորվեն եւ թեստի բացասական պատասխան ներկայացնեն իրենց գործատուներին:

Այս որոշմանը չհետեւող աշխատակիցները չեն կարող աշխատանքի ներկայանալ, եւ, նախարարի խոսքով, նման պարագայում գործատուն իրավունք կունենա խզելու աշխատանքային պայմանագիրը: Իսկ գործատուի նկատմամբ կարող են տույժեր եւ տուգանքներ կիրառվեն՝ որոշմանը չհետեւելու համար:

Այս որոշումը վերաբերում է բոլոր տնտեսվարող կազմակերպություններին: Բացառություն է արվում միայն հղիների եւ պատվաստման համար հակացուցում ունեցող քաղաքացիների համար: Քաղաքական պաշտոններ զբաղեցնող անձանց այս օրենքը եւս չի վերաբերվում: Չնայած դրան, նախարարի խոսքով, պաշտոնյաների մեծամասնությունը Հայաստանում արդեն պատվաստված է:

---

---