Նինոծմինդա–Օրլովկա և Ախալքալաք–Կարծախ ճանապարհները շարունակվում են քանդվել․ ճանապարհային վարչությունը չի պատասխանում

Հուլիսի 22-ին NOR ռադիոկայանը պաշտոնական նամակով դիմել էր Վրաստանի ավտոճանապարհային վարչություն՝ Նինոծմինդա–Օրլովկա և Ախալքալաք–Կարծախ ճանապարհների վիճակի վերաբերյալ տեղեկատվություն ստանալու նպատակով, թե ինչ աշխատանքներ են նախատեսվում տվյալ ճանապարհի բարեկարգման ուղղությամբ։ Վարչությանը ուղղված NOR-ի հարցերը հետևյալն էին․

նախատեսվո՞ւմ է արդյոք Նինոծմինդա–Օրլովկա և Ախալքալաք–Կարծախ ճանապարհահատվածների վերանորոգում կամ ասֆալտապատում
եթե աշխատանքներ նախատեսվում են, ապա որո՞նք են դրանց մեկնարկի և ավարտի ժամկետները

Սովորաբար, հանրային տեղեկատվության տրամադրման վերաբերյալ պաշտոնական հարցմանը պատասխան պետք է տրամադրվի անմիջապես, իսկ որոշ դեպքերում՝ ոչ ուշ, քան 10 աշխատանքային օրվա ընթացքում, սակայն մինչ օրս՝ սեպտեմբերի 3-ը, NOR ռադիոկայանը Վրաստանի ճանապարհային վարչությունից որևէ պատասխան չի ստացել տվյալ խնդրի վերաբերյալ։

Այսօր կրկին գրավոր դիմել ենք վարչությանը՝ պարզելու, թե ինչ փուլում է գտնվում մեր հարցման պատասխանը։ Ստացված պատասխանը կներկայացնենք մեր հետագա նյութերում։

Այս պահին բնակիչների միակ հույսը մնում է ձմռան գալը՝ «գուցե ձյունն ինքը հարթեցնի ճանապարհը»։

Վերոնշյալ ճանապարհները երկար ժամանակ գտնվում են անմխիթար վիճակում և շարունակաբար քանդվում են, ինչը զգալիորեն խոչընդոտում է տրանսպորտային միջոցների երթևեկությանը և խնդիրներ ստեղծում ճանապարհային երթևեկության մասնակիցների համար։ Ճանապարհների վատ վիճակի պատճառով բազմաթիվ մեքենաներ վնասվել են։

Բացի այդ, քանդված ճանապարհներից բարձրացող փոշին տարածվում է հարակից գյուղերում՝ ոչ միայն անհարմարություն պատճառելով բնակիչներին, այլև բացասաբար անդրադառնալով նրանց առողջության վրա։

Հիշեցնենք, որ հուլիսի 22-ին Վաչիանի բնակիչները, դժգոհելով ճանապարհի անմխիթար վիճակից, փակել էին Ախալքալաք–Կարծախ ճանապարհը և պատասխան էին պահանջել դրա վերանորոգման վերաբերյալ։

Մանրամասները տեսանյութում՝

Նինոծմինդայից Օրլովկա ճանապարհահատվածը դառնում է անանցանելի

Ախալքալաք-Կարծախ ճանապարհը մնում է դժվարանցանելի